العنيده
ويقررلنا وينفذلنا كمان من غير ما يعملنا أى إعتبار. .
....
طبعا انا بعد ما اڼفجرت فيهم كده خدت اللى فيه النصيب منهم ده غير ماما اللى بهدلتنى بسبب نرفزتى وصوتى العالى وكلامى عن أحمد ...
وفضلنا كلنا نتناقش فالموضوع.
وماوصلناش لحل.
وبعد ما الكل مشي رجعت انا نزلت ل عمى الكبير وبعد ما اعتذرتله شويه فضلت اتحايل عليه انه يشوفلى طريقه تخليني اقعد اتكلم مع اللى اسمه عمرو ده قبل ما يتقدم رسمى عشان بابا مايدبسنيش
عمى كان متردد عشان مش كان حابب إننا نتصرف فى موضوع ذى ده من غير علم بابا بس انا فضلت وراه لحد ما اقنعته ولما قال ل سي أحمد عجبه الاقتراح ده جدآ وقال إنه هيرتب مع عمرو مع إنها ماتستاهلوش! !!!!!!!!!!!!
ومش عارفه من امتى وهو بقي واخد عليا للدرجادى !
المهم عمى اتكلم مع ماما وطبعا ماما واخويا لازم يعملوا قصه ويرفضوا ويخافوا من بابا ورد فعله.
بس عمى اقنعهم وقالهم انه لو حس من ناحيتى بأى قبول هو بنفسه هيتصل ب بابا ويخلص الموضوع. .
واتجمعنا كلنا عند عمى ووصل سي عمرو وأنا قبلها كنت رافضه تماما فكرة انى ادخل فالاخر بقي وكده
قلتلهم مادام هى جلسة تعارف خلينا نمشيها عادى
ونفذت كلامى برغم اعتراضهم وقعدنا كلنا فالصالون مع بعض قبل ما هو يوصل..
وكل الكلام ده طار من دماغى فجأه. ..
والله العظيم مش ب بالغ ولا بزودها ولا حاجه. .
ومش هقول بقي انه خارق الوسامه وإنه طويل أوى وعريض شويتين وشيك جدا والكلام ده.
لأ هو آه كان وسيم بس مش الوسامه الشديده بتاعة الممثلين دى وطوله معقول مش طويل أوى يعنى
حتى لبسه ماكانش مبالغ فيه.
بس فعلا وحرفيا انا انجذبتله جدا من أول نظره
ليه طله وهيبه كده على اده بس لايقه عليه أوى
وطبعا احنا ماعندناش سلام بالايد خالص فهو سلم على عمى وعلى اخواتى وعلى ابن عمى التانى
وإحنا قال لينا السلام كده من بعيد وقعد مع عمى والشباب هى القعده كانت عباره عن اتنين صالون جنب بعض مفروشين بطريقه تخليهم كأنهم طقم واحد وقعدنا احنا فى ناحيه وقصادنا كانوا هم قاعدين. .
ومراة عمى قاعده جنبي وفضلت تتكلم مع سي عمرو وهو طبعا كان بيضطر أوقات كتير يبصلها وهو بيرد عليها وطبعا كان ب يبصلى انا كمان من تحت ل تحت كده.
مانكرش انى كنت مبسوطه وكنت مكسوفه كمان و دى اصلا حاجه نادره بالنسبالى انى اتكسف وكدهون.
مبدءيا كده كلامه وطريقته وتعبيراته وهدوءه وحبهم كلهم ليه واللى كان واضح أوى طول القعده.
حاجات كلها كانت مريحانى كده وخلتنى ابدأ استريحله شويه صغيرين. ..
وكانت القعده مليانه هزار وضحك وروقان عالاخر. .
وأنا كنت متنحه تماما مركزه معاه وسرحانه طول الوقت وهو ما حاولش خالص يوجهلى أى كلام
وعمى سمحلنا نقوم نقعد سوا فالركنه اللى كانت جنب الصالون وأنا كنت ھموت من الكسوف وقتها. .
ومع إنى كنت محضراله شوية أسأله محترمه بس كله ضاع الحمد لله لأن هذا ال عمرو مش ادانى أى فرصه انى آخد نفسي حتى ووالله من غير لا سلام ولا أى حاجه لقيته خد وضعه وفتح عالرابع على طول
لو عديتلك السنين اللى فضلت مستنى فيها القعده دى مش هتصدقينى
...........حسيت والله انى بتخيل أو بشوف فيلم هابط فالتليفزيون معرفش بس اتفاجأت جدا بكلامه و جرءته ....
_ معلش. آسف والله.
بس انا فعلا مش مصدق لحد دلوقتي
بصوا انا عارفه نفسي وحافظه شكلى صم يعنى أنا مش صاحبة جمال رهيب اللى ممكن يبقي السبب فالنظره اللى ب يبصلى بيها دى. ...هو ب يبصلى وكأنه شايف أحلى واحده فالعالم مثلا. ...وبما انى عارفه ملامحى وحفظاها.
فممكن اقول إن الأخ ده حاجه من اتنين. هو ممكن يكون مش بيشوف كويس. أو ممكن يكون فهمه على اده وعبيط مثلا مش بقول انى وحشه والله بس جمال عادى يعنى مش لدرجة الأوفر بتاعته دى و الأوفر ده زاد أوى أوى فى بقية الحوار. ..
ما هو انا اصلا عايزه أعرف يعنى حضرتك عرفتنى امتى. !!
انا فعلا انهارده اول مرة أشوف حضرتك اصلا. .واول مره نتكلم سوا
إنت اول مره تشوفينى لكن انا شايفك وعارفك من زمان أوى من أيام ما كنتى فى ثانوى تقريبا من وقتها يا مرام وانت شاغله دماغى بشكل كبير أوى.
وكل ما الوقت يعدى اقول يمكن تكون فترة مراهقة وتخلص بس كل ما كانت سنه تعدى كنت بنشغل بيكى اكتر.
وماتسالينيش ليه انا نفسي معرفش والله.
بس انت بالنسبالى كنتى بنت جميله و هاديه وبريئه أوى و متربية زياده عن اللزوم كمان فى حالك دايما ومالكيش دعوه باللى حواليكى. وحاجات كتير بس معرفش ايه بالظبط اللى جذبنى فيكى ومع الوقت بقيت بستنى أى صدفه اشوفك فيها.
ولما انت دخلتى طب فرحت أوى وقلت كويس انك دخلتى كليه طويله شويه عشان ماتتخطبيش بسرعه قبل ما أكون أنا اتخرجت و اتعينت وطبعا كل مناسبات العيله هنا انا كنت حاضر فيها كلها تقريبا.
وكنتى انت دايما قدامى وبطمن عليكى عارفه انى قلت مره ل أمى إنى مبسوط عشان حاسس إنك بتكبرى قصاد عينى. .
الأخ عمال يحكى ويتكلم عادى جدآ ولا كأنه حاسس باللى بيعمله كلامه ده فيا. ..أنا أول مره اتحط فى موقف ذى ده واسمع الكلام ده. ......
_ ساكته ليه. ..
عايز أسمع صوتك وتتكلمى معايا ..
........بصراحه مش عارفه اقول ايه.
اصلآ كلامك غريب عليا شويه. و أول مره ابقي فالموقف ده
.......بس إنت كنتى مخطوبه. ولمدة سنه ونص كمان
يعنى ايه !
....يعنى. ..أقصد انك ...خلاص مفيش
هو ايه اللي خلاص يعنى
معلش فهمنى تقصد ايه
والله مش قصدى حاجه وحشه.
إنت شكلك زعلتى بس بجد ماقصدش حاجه..
انا بس افتكرت خطوبتك..
و دى والله كانت أيام وحشه أوى بالنسبالى..
مش عارف إن كنتى تعرفى انى اتقدمتلك قبل كده وللا لأ
. ......ده بجد !!
لأ معرفش. حصل امتى ده بستعبط بستعبط
_. ...كنت أنا فى اخر سنه. ولقينا مراة عمك بتتصل تسالنا عن واحد قريبنا وعرفت انه متقدملك ووقتها كنت هتجنن أولا لأنى كنت حاسس انى خلاص قربت اتخرج وهاجى اتقدملك وفجأه الاقى حد متقدملك واتفاجأت لما لقتكم بتسالوا عنه يعنى انتم ممكن توافقوا على خطوبه وانت لسه فى سنه تالته و ده طبعا كان عكس توقعاتى خالص وثانيا لأن الأخ اللى كان متقدملك ده ماينفعكيش خالص وكان هيتعبك أوى معاه وفضلت انا ورا ماما لحد ما كلمت مراة عمك وحذرتها من العريس ده.
وبعدها حاولت كتير مع بابا وماما عشان يخطبوكى ليا ولما عرفت اقنعهم انى اخطب وأنا لسه فالكليه. لقيت مامتك رفضت و أجلت الموضوع ..
كنت مكتئب وقتها جدا يا مرام.
.....أحم. ...مش شايف يعنى انك شايل الألقاب بدرى أوى. .
يعنى كل شويه مرام مرام عادى كده !!!!!!!!
ههههههههههههههههههه. .
بدرى ايه حضرتك! !
بقولك بقالى سنين مستنى اتكلم معاكى لوحدنا ذى دلوقتى كده ف لما الحلم يتحقق أقوم انا احط بينا ألقاب !!
انت ماتعرفيش اصلآ إسم مرام ده غالى عندى أد ايه فماتلوميش عليا لما أفضل أقوله كتير
لا يا راجل !!!!
بصوا أنا اصلى أمور السهوكه دى مابتدخلشي زمتى خااالص ومش بصدق فالحب والكلام ده. ..ولقيت نفسي ڠصب عنى برد عليه. .
يا سلااااام. ..!!!
والمفروض انى أصدق كل ده بقي !مع إنى سمعت انك كنت خاطب لسه من قريب يعنى ڠصب عنى الكلام خرج بطريقة سخريهوالرجل يا عينى اتفاجىء من ردى وطريقتى واتلخبط عالاخر....
العنيدة قصة حقيقية بقلم سماح سماحه.
بصراحه كلامه عصبنى ونرفزنى أوى
قاعد يشتغلنى شوية يقولى اسمك غالى
سنين متعلق بيكى
جمال
براءة
هدوء
ايه الفيلم الهابط ده !!
ده واحد ماكررش طلبه تانى من كام سنه لما حاول يتقدملى.
وبعدها راح خطب
طيب ممكن من غير عصبية ومن غير تريقه كمان. .
انا كده كده جاى وناوى احكيلك كل حاجة..
وفعلا من أول ما بدءنا نتكلم وأنا بحكيلك اهه. .
.......سورى مش قصدى اتعصب. وأكيد طبعا مفيش تريقه ولا حاجه. .
حتى لو في ولا يهمك.
إنت بالذات تعملى اللى إنت عايزاه.
يا ربيييي. .السهوكه والتلذيق ده أوفر والله. .اهه بيعصبنى ويرجع يزعل لما أرد عليه. .........
بص مبدئيا كده خلينا نتفق إن فى شوية من كلام حضرتك ماينفعش يتقال خالص بصراحه..
يعنى يادوب دى قعدة تعارف مش أكتر.
يعنى يا عالم الموضوع هيكمل وللا لأ. فمفيش داعى نتعدى أى حدود دلوقتى.
ده غير إن اللى حوالينا دول فى بينهم عمى واخواتى كمان وبصراحه هحس انى مش محترماهم وأنا قاعده اسمع كلام ذى ده وهم موجودين
......حاضر يا سيتى. هصبر.
و آسف لو كلامى ضايقك أو حسيتى انه زياده شويه. مع إنه والله أقل بكتير اووى من اللى عايز اقوله. .
بس ممكن بلاش حكاية إن الموضوع ممكن مايكملش دى !
بإذن الله هتكونى من نصيبى .انا حاسس ب كده.
انا بس عندى طلبين . وياريت ماتزعليش منى بسببهم
اتفضل
أول حاجه. عايزك لو يعنى لا قدر الله فكرتى انك ترفضي الموضوع ماتبلغيش حد عندكم اللا لما تقوليلى الأول على سبب رفضك. ممكن
. ...ده طلب غريب أوى. وصعب كمان.
هبلغ حضرتك اذاى و ب أى صفة
وهيبقي اسمى ووصفى ايه لما ابلغك حاجه ذى كده من ورا اهلى
وليه اصلا !
مرام. انا مستحيل هطلب منك حاجه تكون ضد ثقة أهلك فيا ونفسي انت كمان تثقى فيا.
انا بس قصدى يعنى انك بعد قعدتنا دى سوا. لو حصل وحسيتى بحاجه تخليكي مياله للرفض انك قبل ما تخدى قرار نهائى استنى بس شويه لحد ما نقعد تانى سوا وقوليلى عاللى شاغلك أو اللى قلقك. يمكن اقدر اقنعك انا
